Afturvendi Magn við Streymin-kappingin varð hildin um vikuskiftið. Hesuferð luttóku 12 skjúttar, og skotið var í trimum bólkum eftir 75 dúgvum. Væl gekk at avvikla kappingina, og veðrið var av tí fagrasta, so menn fingu eina fína kapping, hóast úrslitini ikki vóru at reypa um. Av tí at tað bara vóru 12 skjúttar við, avgjørdu vit, áðrenn kappngin byrjaði, at A-bólkurin eisini skuldi sleppa at royna at skjóta eina finalurundu, meðan meistarabólkurin skjeyt sum vanligt. Spenningur var á monnum, og man merkti, at meira stóð upp á spæl enn annars, nú tá ið finala eisini varð í A-bólkinum. Tá ið avtornaði, varð shoot off millum Sigurd Rasmussen og Jákup Mikkelsen um 3. plássið, sum Jákup vann. Regin Hentze gjørdist nr. 2 og vinnari av A-bólkinum gjørdist Magni Dam. Í semifinaluni í meistrarabólkinum varð shoot off millum Sámal Debes og Jóannis Joensen, um hvør skuldi kappast ímóti unga og evnaríka Tóra Fløtt í gull-finaluni. Tað gjørdist Jóannis, sum trekti longsta stráðið og vann á Tóra Fløtt, sum gjørdist nr. 2, og 3. plássið fekk Johnny á Túgvu. Vit takka Magn við Streymin fyri stuðulin.