Reglugerð fyri FM í skeet og trap

Mesta tal av skjúttum til FM-kappingina er 18. Tilmeldingin endar kl. 20.00 hósdagin frammanundan kappingini.
Um yvirteknað er, verða 18 teir bestu skjúttarnir valdir út við at hyggja eftir miðaltalinum í øllum 25 tal umførunum í inniverandi kappingarárið, í kappingum í Føroyum.

Finalurnar í skeet vera skotnar eftir galdandi ISSF reglum, og finalurnar í Trap vera skotnar eftir galdandi ISSF OL-Trap reglum (eisini á American Trap breytum).

Unglingar
Unglingar skjóta saman við hinum skjúttunum. Tann unglingi, sum hevur skotið flest dúgvur í innleiðandi umførunum áðrenn finaluna, hevur vunnið unglinga kappingina.

Er javnt, verður hugt eftir hvør hevur besta umfar.

Er framvegis javnt, verður hugt eftir hvør hevur næst besta umfar, síðani næsta o.s.fr.

Er framvegis javnt, verður hugt aftureftir í úrslitinum í seinasta umfarinum. Tann sum seinast misti eina dúgvu, hevur tapt.

Tú er unglingur, um tú er 21 ár ella yngri, tá kalendara árið byrjar 1. januar.

Vinningar
1. vinningur 3.000 kr.
2. vinningur 2.000 kr.
3. vinningur 1.000 kr.
Unglingar fáa somu vinningar.

Vinningar skulu nýtast 31. desember árið eftir FM kappingina. Vinningarnir skulu nýtast skjótingini at frama t.d. skjótivenjingar, skjótiskeið, kappingar, skjótiútgerð o.s.fr. Skjótisambandið skal góðkenna hvat vinningurin skal nýtast til.

Skjúttar
Fyri at fáa pláss í FM finalu, skal skjútti:
1. verða skrásettur limur í føroyskum limafelag undir SkF.
2. hava vant regluliga í Føroyum.
3. hava luttikið regluliga í skjótikappingum í Føroyum.
4. verða fastbúgvandi í Føroyum, ella hava verðið búsitandi í Føroyum í minsta lagi 1
samanhangandi ár, seinastu 5 árini.

Skjúttar ið ikki liva upp til hesar treytir, kunnu luttaka í FM sum gestaskjúttar, men teir kunnu ikki fáa pláss í sjálvari finaluni, ella luttaka í unglingakappingini.
Formaðurin í SkF kann í samráð við starvsnevndina í SkF, gera undantak frá hesi áseting.
Innan sjálv kappingin fer í gongd, skal kunnast um ein ella fleiri útlendskir gestaskjúttar luttaka, sum ikki kunnu koma í finaluna.

Samtykki
1. Reglur samtyktar á nevndarfundi í SkF, við Norðskála tann 9. sept. 2020.
2. Reglur samtyktar á nevndarfundi í SkF, í Vestmanna tann 4. nov. 2020.
3. Reglur samtyktar á nevndarfundi í SkF, umvegis Messenger tann 2. juni 2021. (reglur viðv. útlendskari luttøku)
4. Reglur samtyktar á nevndarfundi í SkF, í Vestmanna tann 29. sept. 2021. (javnt avgjørt uppá miðaltal í 25 tal umførum)