Alex Johannesen úr Eysturskot

Sætti og seinasti filmurin í røðini um føroyska ítróttarskjóting, er ein samrøða við Alex Johannesen úr Eysturskot.

Alex byrjaði sum 15 ára gamal at skjóta skeet, men valdi við tíðini, at miðsavna seg um trap skjótingina.

Størsta uppliving hjá Alex er á oyggjaleikum í 2019, tá hann vann ABT kappingina fyri einstaklingar, og setti nýtt oyggjaleikamet. Haraftrat vakti tað ans, at Alex megnaði at skjóta seg til eitt silvur heiðursmerki í OL-trap, tí tá verður kappast á eini skjótibreyt, sum vit ikki hava í Føroyum í dag.

Alex varð við at stovna Eysturskot í 2016, og herfyri bleiv breytin hjá felagnum úti á Vík í Leirvík tikin í nýtslu. Breytin er opin leygardagar, og undirtøkan hevur verðið einastandandi. Uml. 30 nýggir skjúttar eru vanliga á breytini og venja, tá hon er opin. Fyrsta almenna kapping verður á breytini 24. apríl, tá Flaggdagskappingin stendur á skránni.

Marius F. Joensen úr Sunda Byrsufelag

Fimti filmurin í røðini um føroyska ítróttarskjóting, er ein samrøða við Marius F. Joensen úr Sunda Byrsufelag Norðskála.

Marius hevur íðka bæði judo og kappróður á høgum støði, men valdi so at raðfesta ítróttarskjóting í staðin.
Í ítróttarskjótingini hevur Marius veruliga víst styrki, og sambært hagtalsskipanini hjá Skjótisamband Føroya, er hann einasti skjútti í Føroyum, sum hevur eitt miðaltal í kappingum omanfyri 22 útav 25 møguligum.

Á oyggjaleikinum á Bermuda í 2013, kláraði Marius saman við Sámal E. Debes, at verða fyrsti skjútti at vinna gullheiðursmerki fyri Føroyar í skjóting, aftrat tí vann hann eisini einstaklinga kappingina.
Marius hevur endurtikið bragdið í øllum oyggjaleikinum, sum hann hevur luttikið í síðan, og á Jersey í 2015 megnaði hann enntá at seta nýtt oyggjaleika met.

Við altjóða ISSF limaskapinum, sum Skjótisamband Føroya fekk innan jól í fjør, hevur Marius ynski um, at umboða Føroyar í EM og HM uttanlands. Áðrenn limaskapin, kundu føroyskir skjúttar ikki luttaka undir egnum flaggið í altjóða kappingum uttanlands.

Benjamin Thomassen úr Veiðifelagnum Byrsumúla

Fjórði filmur í røðini um føroyska ítróttarskjóting, er ein samrøða við 26 ára gamla Benjamin Thomassen, úr Veiðifelagnum Byrsumúla úr Tórshavn.

Trygd í samband við skjóting er sera týðandi, og vápnatrygdarskeið verða regluliga boðin út í samstarvið við skjótibreytirnar í Føroyum. Á einum av hesum skeiðum luttók Benjamin, og eftir at hava tikið verkliga partin av skeiðinum á skjótibreytini, fekk hann kunnleika til ítróttarskjóting, og byrjaði av álvara at íðka ítróttin.

Í 2020 hevði Benjamin ein av sínum heilt góðu døgum í Simme Cup, har tað eydnaðist honum heilt óvænta, at vinna sjálva Simme Cup kappingina, sum er í millum 6 teir fremstu skjúttarnir í kappingini.

Skjótisamband Føroya hevur eina stuðulsskipan til nýggjar og ungar úrvalsskjúttar, har teir kunnu fáa hjálp frá sambandinum til venjing. Benjamin er ein av skjúttunum, ið hevur notið gott av hesi skipan, og kann úrslitið í Simme Cup kanska síggjast aftur í hesi skipan.

Seinasta tíðina hevur Benjamin verðið uttanlands í sjúkraørindum. Vit í Skjótisambandinum ynskja tær góðan bata, og gleða okkum at síggja teg aftur á skjótibreytini.

Jón Jacobsen úr Veiðifelagnum Byrsumúla

Triði filmur í røðini um føroyska ítróttarskjóting, er ein samrøða við Jón Jacobsen úr Veiðifelagnum Byrsumúla úr Tórshavn.

Jón hevur altíð havt áhuga fyri skjóting, men byrjaði ikki at luttaka í ítróttarskjótingini fyrr enn í 2015. Beinanvegin vísti hann góð evnir, og longu árið eftir í 2016, megnaði hann at vinna fyrstu kappingina, tá hann vann í trap í Simme Cup. Kappingin er ein heiðurskapping uppkalla eftir Simma Jacobsen, fyri hansara íkast fyri ítróttarskjótingini í Føroyum.

Sama ár megnaði Jón á síni fyrstu uttanlands kapping, at skjóta eitt 25 tal í OL trap í Vamdrup Grand Prix. Hetta er einasta 25 tal, ið nakar føroyskur skjútti nakrantíð hevur skotið í eini OL trap kapping.

Í 2017 megnaði Jón at skjóta seg á oyggjaleikalandsliðið sum luttók í Gotlandi, og tá hesin filmurin varð tikin upp, hevur Jón júst vunnið FM heiti í trap fyri 2020.

Tórur Fløtt úr Sunda Byrsufelag

Annar filmur í røðini um føroyska ítróttarskjóting, er ein samrøða við Tóra Fløtt úr Sunda Byrsufelag.

Tórur er føddur í 1997, og byrjaði á ungum árum at venja OL skeet. Í 2017 megnaði hann at skjóta seg á føroyska landsliðið, og hevur hann tvær ferðir umboða Føroyar á oyggjaleikunum. Her hevur hann vunnið tvey gull og eitt bronsu heiðursmerki. Gull heiðursmerkini er vunnin í liðkappingini, saman við Sámal E. Debes og Marius F. Joensen.

Í fjør megnaði Tórur eisini at sláa føroyska meti í eini OL skeet finalu, við at raka 53 útav 60 dúgvum.

Tórur venur dagliga á OL skeet breytini á Norðskála, og í filminum greiður hann m.a. frá, hvussu væl hann bleiv móttikin á skjótibreytunum sum eru í Føroyum.

Kappingarárið 2021

Nýtt kappinginarár fer av bakkastokki 27. mars, tá F80 føðingardagskappingin hjá Veiðifelagnum Byrsumúla er á skránni. Kappingar kalendarin fyri 2021 síggja tit her: [Trýst her]

Við kappingini byrjar eisini nýggj úttøka til norðurlanda meistarakappingina (NSR) í Finnlandi 4-7. aug. 2022. Úttøkureglar síggjast her [ Trýst her ]

Á somu slóð síggjast eisini m.a. reglarnar fyri Føroya Cup, Grand Prix, FM og nýggju makkarakappingina, sum verður roynd fyrstu ferð í ár.

Nordic Shooting Region “2020”

Avgjørt varð í fjør, at flyta Nordic Shooting Region 2020 til juni í 2021. Nú er so avgjørt, at avlýsa fyri 2021, og í staðin hava kappingina 4-7 aug. 2022.

Nýggj úttøka til NSR 2022 byrjar 27. mars 2021.

Skjótisambandið fingið altjóða limaskap

Skjótisamband Føroya hevur nú fingið limaskap í International Shooting Sport Federation. Føroysk ítróttafólk innan skjóting kunnu sostatt vera við í altjóða kappingum undir føroyskum flaggi

Skjótisamband Føroya kann nú senda síni ítróttafólk til altjóða kappingar undir føroyskum flaggi. Skjótisambandið hevur fingið limaskap í International Shooting Sport Federation, ISSF, eftir at sersambandið fyrstu ferð søkti um limaskap í august 2019.

Føroysk ítróttafólk innan skjóting kunnu sostatt eisini vera við í kappingum, sum Evropeiska Olympiska Nevndin, EOC, skipar fyri. EOC staðfesti endaliga í 2019, at Føroyar sleppa at luttaka undir føroyskum flaggi í EOC-kappingum í teimum ítróttagreinum, har Føroyar hava altjóða limaskap.

– Hetta eru frálík tíðindi – serstakliga fyri menningina av føroyskum skjótiítrótti. Vit eru sera takksom fyri, at ISSF hevur bjóðað okkum vælkomnum upp í felagsskapin. Limaskapurin fer ikki einans at geva okkara ítróttafólkum íblástur, hann fer eisini at geva okkum royndir á hægsta stigi. Vit eru so sera takksom fyri hesi góðu tíðindi, sigur Esmar Joensen, formaður í Skjótisambandi Føroya.

ÍSF fegnast um altjóða limaskapin hjá Skjótisambandinum. Jon Hestoy, varaforseti í ÍSF, sigur, at limaskapurin er enn ein týðandi varði á leiðini at fáa føroyskum ítrótti alsamt fleiri altjóða viðurkenningar.

– Hetta eru stórtíðindi, tá talan er um at menna føroyska skjótiítróttin í komandi árum, og hetta passar sum fótur í hosu við, at vit gera nýggja skjótibreyt, sigur Jon Hestoy.

Hann fegnast um, at alsamt fleiri føroysk ítróttafólk hava fingið høvið at kappast á altjóða stigi undir føroyskum flaggi seinnu árini. Føroyar hava nú altjóða limaskap í 12 ítróttagreinum: bogaskjóting, badminton, dart, fótbólti, hondbólti, parasport, judo, skjóting, svimjing, borðtennis, taekwondo og flogbólti.

Kappingarárið 2021

Kappingarkalendarin hjá SkF fyri 2021 er nú klárur. Sí kalendara: [ Trýst her ]

Í 2021 fara vit at royna eina nýggja kapping við pørum, sum koyrir parallelt við hvørja kapping. Kappingin verður nevnd “makkarakappingin”

Føroya Cup, Grand Prix og FM verða eisini í 2021.

Sí reglar fyri FM, GP, FC og MAK her: [ Trýst her ]