Kappingarárið 2021 er nú liðugt, og síðan skipa skráseting bleiv av úrslitum frá skjótikappingum í Føroyum, hevur undirtøkan fyri føroyskari ítróttarskjóting, ongantíð verði so stór, sum hon varð í ár.

Av teimum 22 kappingunum sum vóru avgreiddar í 2021, vóru tað tilsamans 350 tilmeldingar, sum er met. Gamla meti er frá 2015, tá 312 tilmeldingar vóru.

12. juni vóru 36 íðkarar til skjótikapping sama dag, hetta er eisini met luttakaratal, ið nakrantíð er skrásett til kapping í Føroyum. Gamla meti er frá 2012, tá luttakaratalið varð 34 sama dag.

Góða undirtøkan sæst nú eisini aftur í tilgongdini av nýggjum íðkarum, tí heili 19 nýggir íðkarar, hava fyri fyrstuferð luttikið í skjótikapping í 2021.

Orsøkin til góðu gongdina, er heilt vist góða arbeiði sum limafeløgini í Skjótisambandinum gera. Onnur tiltøk, sum t.d. lýsingarfilmurin, ið bleiv gjørdur í samband við FM í 2020, hevur eisini havt eina góða ávirkan.

Kappingarkalendarin fyri 2022 verður klárur um jóltíðir, men longu nú kanna avdúkast, at okkurt nýtt og spennandi verður í kalendaranum.

Takk fyri í ár.